( المقدمه )
ــ ( انت يا فندي يا اللي قاعد تكتب انت يا فندي ) كانت اول كلمه سمعتها من اول ما ركبت الميكروباص في اليوم ده فسبت القلم من ايدي وشيلت سماعة الموبايل من ودني وإلتفت اشوف مين بينده
ــ أفندم حضرتك ؟
فرد الراجل بشكل عصبي جدا : الاجره يا استاذ دي خامس مره أنده عليك فيها
فرديت وانا مستعجب
ــ طيب بالراحه حضرتك .. هو انا نزلت ومدفعتش يعني !!
انسكف صاحبنا علي دمه ورد بهدوء :
ــ مهو مش طبيعي يعني احنا لمينا الاجره وانت قاعد تكتب وحاططلي سلكين في ودنك ومش سامعنا .. هو احنا بنكلم نفسنا يعني ؟
بصتله بإستعجاب وانا بردد بصوت واطي ( سلكين !! ) وحطيط ايدي في جيبي وسألته :
ــ استغفر الله العظيم يارب .. الاجره كام يا سيدي ؟
ــ 2.5
شيلت ايدي من جيبي تاني وبصتله بإستغراب :
ــ 2.5 ايه ياعم دي بـ اتنين الا ربع
رد وهو متعصب زي ما اكون شتمته :
ــ هو انا هسرقك !! .. وانا مال أهلي بالموضوع ده .. انا دفعت 2.5 وانا اصلا اول مره اركب فيها الطريق ده
لقيت السواق بينده بصوت عالي من قدام وبيقول .....
ــ الاجره بـ 2.5 يا فندي البنزين غلي
اضطريت ارد رد منطقي :
ــ بنزين ايه يا اسطي ما الموقف اللي بعدكم بيركب لسه بـ اتنين الا ربع وبينه وبينكم مفيش 200 متر يعني
فرد السواق طبعا بألاطه وتناكه لاننا بقينا في نص الطريق :
ــ كنت روح اركب من هناكـ
للاسف ,, اضطريت ادفع الـ 2.5 عشان أخلص نفسي من الزهق اللي انا فيه ده اديته الفلوس ورجعت اكتب تاني ورجعت السلكين ^_^ في وداني تاني وبدءت اكتب الموقف اللي حصل بالظبط عشان يكون اول موقف ابدء بيه الكتاب اللي بحضرله ,, وبعد خمس دقايق لقيت صاحبنا اللي قاعد ورايا اللي ندهني في الاول بيبص من فوق لتحت كده ومش علي بعضه بيشوفني بعمل ايه ….
شيلت السماعه من ودني وسألته اذا كان في حاجه ولا حاجه مضيقاه وانا مش واخد بالي فرد وهو محرج :
لا لا مفيش حاجه ,, بس هو انت بتذاكر ؟
استغربت من ده سؤال .. ايه اللي هو انت بتذاكر ,, هنهزر ,, خدت نفس عميق ورديت
ــ لاء مش بذاكر .. انا بكتب كتاب وبسجل يومياتي
قبل ما انطق أخر كلمة يومياتي ( أتي ) لقيته انشكح كده وفتح بوئه وقالي :
ــ هو انت فنان ؟!
قولت ايه المصايب دي بئا .. قولت عشان اخلص بئا ( اه فنان يا سيدي )
ابتسم الراجل وبصلي بصه غريبه ,, بصه تخوف ,, وقالي :
ـ وانت بتطلع في فيلم ايه بئا ؟!
( سؤال متوقع اكيد من شخص زي كده وجاي بعد رد زي اللي رديته . انا اللي جبته لنفسي )
بصتله وتنحت ..
ــ فيلم ايه بس .. انــا مش بمثل
اندهش الراجل من الاجابه الشهاده لله ,, وبدء يسأل من جديد وهو بيهرش في دماغه :
ــ أومال فنان ازاي .....
كلم نفسه شويه في سره بتاع ييجي خمس ثواني .. بعدين رجع كمل كلامه
ــ ااااااااااه تقصد يعني انك بتكتب
ابتسمتله ابتسامة واحد كاره حياته وقولتله ( بالظبط كده انا بكتب )
رجع تاني لدهشته وابتسامته وسأل سؤال برضو متوقع من شخص زي ده وييجي بعد الرد اللي انا رديته :
ـ وبتكتب في جرنال ايه ؟ !
ــ هه
ابتديت اجيب اخري معاه فعلا بس كنت عاذره الراجل برضو باين عليه انه طيب اوي ومش فاهم أي حاجه في أي حاجه وللأسف رديت عليه رد غبي تاني وبذكائه استغله انه يسأل سؤال تاني وصلني لحاله من العصبيه الجامده ..
قولتله بإبتسامه .. لاء انا بكتب علي الانترنت .. عندي مدونه كده علي قدي بكتب عليها
ــ مد .. ايه ؟
ــ مدونه يا ريس اسمها باب شارعنا
ابتدي الراجل يستهبل والله اعلم وقالي :
ــ والمدونه دي في انهي حته بالظبط ؟
ــ ع النت يا حج
ــ بتكتب ع النت ؟
ــ ايووووووووه الله ينور عليك
ــ والنت ده عباره عن ايه ؟!
ــ النت يا ريس .. النت
ــ اه عارفه .. مش ده اللي العيال عملو من عليه الثوره ؟
ــ ايوووووووووه هو ده
ــ طب انا بسمع انهم بيقعدو ع النت ,, بيدخلو ع النت ,, انت بتكتب بقا عليه ازاي ؟
بصيت قدامي وبدأت أنفخ ,, ولكن قبل ما ارجع ابصله تاني واجيب اخري معاه ربنا بعت معجزه لقيت البنوته اللي قاعده جنبي فاتحه الفيس بوك من علي موبايل ..
فرحت اوي اوي اوي ,, وبصتله :
ــ بص يا حج الانسه دي فاتحه النت اهوه ,, إسألها اللي انت عايزه .
لقيته خبط علي كتف البنت مره واحده .. بصتله البنت بإستغراب ..
ــ نعم ؟
رد بإندهاشه اللي عودني عليه في الدقايق دي :
ــ هو حضرتك يا أنسه قاعده علي النت
بصتلي البنت بعينها بمعني .. ماله ده ؟
مسبهاش تفوق من دهشتها وراح خابطها مفاجأه تانيه
ــ ممكن حضرتك أشوفه ؟
ضحكت انا ضحك بالهبل ورجعت اسمع اغاني ع الموبايل تاني واكتب تكملة الموقف
والبنت بتديله الموبايل وهو طبعا مسِكها مسبهاش
المهم ,, اخر جملتين سمعتهم بينهم
هو بيقولها : اه هو فعلا النت .. بس غريبه شبه المحمول اوي
والبنت بصاله بحاله متزايده من الاستغراب وهو ماسك الموبايل وباصصله بنفس حالة الاستغراب دي .
عبدالرحمن سامي
للحصول علي نسخه من الكتاب اضغط علي الاسم
